ای کوفه لیلر ای قانیلن اللری رنگین

تاریخی بوتون ننگ و جنایاتیله ننگین

حقّوزدی که قان آغلیه سوز شام و سحرگاه

قان آغلاماقوزدان سیزی قورتارماسون ا...

ای کوفه لیلر ای قانیلن اللری رنگین

تاریخی بوتون ننگ و جنایاتیله ننگین

حقّوزدی که قان آغلیه سوز شام و سحرگاه

قان آغلاماقوزدان سیزی قورتارماسون ا...

ساکت اولون آز آغلیون ای ملّت مکّار

بی جا بو عبث آغلاماقوزدا نه اثر وار

سیز مرتکب اولدوز او جنایاته نه اغیار

بیر ایله جنایت که جهان مثلینی گورمز

تا وار بو جهان پیر و جوان مثلینی گورمز

سیز مثل او گُلسیز که اولار مزبله یرده

برگینده کثافات اوتورار پرده به پرده

موجودیّتوز دست جنایات بشرده

سیز اسلحه ی جنگ سوز اشرارین اَلینده

شمشیر و سپرسوز هامی کفّارین اَلینده

اوز دینوزی دنیایه نه آز قیمته ساتدوز

آزادگی و عزّتوزی ذلّته ساتدوز

انسانیتی یک سره وحشیّته ساتدور

سیز ملّت آییلماز ایله غفلتده یاتوبسوز

شخصیّتوزی قولا روزا مفت ساتوبسوز

افسوس او پیغمبره که امّتی سیزسوز

وای اولسون او بیر مملکته ملّتی سیزسوز

ویران اولا بو شهری که جمعیّتی سیزسوز

سیز عاطفه سیز ملّته انسان دیماق اولماز

سیز ملّت بی دینه مسلمان دیماق اولماز

وار هانسی دیانتده ایا دین سیز امّت

مهمان آدینا امّت امامین ایده دعوت

مهمانین آلوب دورین ایده قتلینه سبقت

قتلینده ز بس چوخلی جسارت لر اولوندی

اُلدوردوله صبریله جنایتلر اولوندی

ای دعوی اسلام ایلین قوم منافق

بی رحم و شقی، سنگدل و فاجر و فاسق

نفرین ایده جاق سیزلری هر لازم و لاحق

دنیاده سیز ایتدوز او فجایعله جنایت

دنیا بویی جانی لر ایده لّر سیزه لعنت

هیچ بُلدوز اَیا دین سیز امّت نلر ایتدوز

اسلاموزون ارکانینی زیر و زبر ایتدوز

اسلامه اَلوزدن نه جفا گَلدی سیز ایتدوز

بو سهلیدی قویدوز اوزوز اوز خانه زی ویران

ویران اولونوب ظلموزوله خانه ی ایمان

اوز ظلموزی عالم لره بُلدورموسوز ای قوم

اسلام گلستانینی سولدورموسوز ای قوم

پیغمبروزون اوغلونی اَلدورموسوز ای قوم

یخدوز اوزونی ایستی قوم اوستونده لب عطشان

کَسدوز سو کنارینده سوسوز قوچ کیمی قربان

ای کاش فقط قوچ کیمی قربان کَسیلِیدی

ای کاش فقط باشی لب عطشان کَسیلِیدی

بیر ضربتیله فدیه ی جانان کَسیلِیدی

بیر خنجرینه اون ایکی ضربت وورولِیدی

نه پیکرینه سُمّ عداوت وورولِیدی